ព័ត៌មានផ្សេងៗទៀត
ឯកឧត្តមរដ្ឋលេខាធិការ មាស ពិសិដ្ឋ អញ្ជើញដឹកនាំក្រុមការងារគម្រោងPEARL ពិនិត្យ វាយតម្លៃ និងជ្រើសរើសសហគមន៍ព្រៃឈើ និងសហគមន៍តំបន់ការពារធម្មជាតិ នៅខេត្តកំពង់ធំ និងខេត្តព្រះវិហារ
ចេញផ្សាយ ១៨ កក្កដា ២០២៥ 359
ចាប់ពីថ្ងៃទី១៦ ដល់១៨ ខែកក្កដា ឆ្នាំ២០២៥ ឯកឧត្តម មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោង «ភាពជាដៃគូ រវាងរដ្ឋ សហគមន៍ និងវិស័យឯកជន ដើម្បីកសិកម្មមានលក្ខណៈភាតរបរិស្ថាន និងជីវភាពប្រជាជនមានភាពធន់ នៅខាងជើងបឹងទន្លេសាប( PEARL) » អមដំណើរដោយ ឯកឧត្តមអនុរដ្ឋលេខាធិការ សាយ សុភភោគា បានដឹកនាំក្រុមការងារគម្រោង រួមមាន៖មន្ត្រីក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន រដ្ឋបាលព្រៃឈើ មន្ទីរកសិកម្ម រុក្ខាប្រមាញ់ និងនេសាទខេត្ត មន្ទីរបរិស្ថានខេត្ត និងអង្គការFAO បំពេញបេសកកម្មនៅខេត្តកំពង់ធំ និងខេត្តព្រះវិហារ ដើម្បីពិនិត្យ វាយតម្លៃ និងជ្រើសរើសសហគមន៍ព្រៃឈើ និងសហគមន៍តំបន់ការពារធម្មជាតិ ជាសហគមន៍គោលដៅថ្មីរបស់គម្រោង ។
សូមជម្រាបថា គម្រោងនេះបានទទួលហិរញ្ញប្បទានឥតសំណង ពីមូលនិធិអាកាសធាតុបៃតង (Green Climate Fund, GCF) តាមរយៈ FAO សម្រាប់អនុវត្ត នៅខេត្តកំពង់ធំ សៀមរាប ឧត្តរមានជ័យ និងខេត្តព្រះវិហារ ពីឆ្នាំ២០២៣ ដល់ឆ្នាំ២០២៩ ដោយមានគោលបំណងគាំទ្រកសិករ សហគមន៍កសិកម្ម និងក្រុមហ៊ុនឯកជន ក្នុងការបង្កើនភាពធន់នឹងការប្រែប្រួលអាកាសធាតុ ព្រមទាំងបង្កើន និងកែលម្អផលិតភាព អាជីវកម្ម និងប្រាក់ចំណូល ពាក់ព័ន្ធនឹងផលិតកម្ម និងពាណិជ្ជកម្មផលិតផលកសិកម្ម ។
ទន្ទឹមនឹងនេះ គម្រោងក៏រួមចំណែកថែរក្សាធនធានធម្មជាតិ និងបរិស្ថាន ជាពិសេសតំបន់ព្រៃឈើ ដែលជាផ្ទៃរងទឹកភ្លៀង ឬ ទីជម្រាល ដោយអនុវត្តវិធានការពារបរិស្ថាន មនុស្ស និងសង្គម (Safeguard) ដោយគាំទ្រ និងសហការជាមួយសហគមន៍ព្រៃឈើ និងសហគមន៍តំបន់ការពារធម្មជាតិផងដែរ ។ ការគាំទ្រ និងកិច្ចសហការនោះរួមមានការផ្តល់ចំណេះដឹង បច្ចេកទេស និងមធ្យោបាយជូនសហគមន៍ដើម្បីបង្កើតមុខរបរផ្សេងៗ ព្រមទាំងការពារ និងស្តារព្រៃឈើរបស់សហគមន៍។
ជាលទ្ធផលគឺក្រុមការងារ គណៈកម្មាធិការដឹកនាំសហគមន៍ និងអាជ្ញាធរភូមិ និងឃុំ បានពិភាក្សា ពិនិត្យ និងវាយតម្លៃស្ថានភាពជាក់ស្តែង ឃើញថាសហគមន៍ដែលត្រូវបានគម្រោងជ្រើសរើសកាលពីឆ្នាំ២០១៩ លែងមានភាពសមស្រប ដូច្នេះចាំបាច់ត្រូវជ្រើសរើស និងសហការជាមួយសហគមន៍ថ្មី ដែលមានភាពសមស្រប ។ ក្រុមការងារគម្រោងនឹងស្នើសុំការសម្រេចជាផ្លូវការពីក្រសួងកសិកម្ម រុក្ខាប្រមាញ់ និងនេសាទ និងក្រសួងបរិស្ថាន នៅពេលខាងមុខនេះ៕
